Toe ek twee maande gelede my laaaang hare afgesny het, die eerste keer in 5 jaar, het ek hierdie storie onthou. Met deernis. Terugverlang na die dae toe kaalvoetloop en paddavissies vang, was soos om asem te haal.
Ek sien nie meer skoolmeisies met kort hare nie. Is dit ‘n mode ding? As ek terugdink aan my matriek klas, dan was daar ongeveer 1/3 met lang hare. Die res van ons is kort-kop deur die lewe.
Ek het anyway sulke spriete vir hare gehad toe ek klein was, die haarkapper het vir my ma gese om dit kort te hou, en dit sou regkom. Ek weet nie of daar waarheid in is nie, maar DIT HET reggekom. Ek sit met ‘n bos, en as die weer of die mood net reg is, is daar ‘n ontembare kinkel in die kop.
Ek weet nie of dit ‘n landswye tendens was nie, maar hier in die middel 80’s, was die ‘mushroom cut’ vreeslik mode. Oe, ‘n meisie in my klas het blonde hare gehad, en as die snit pas gedoen is, was dit die mooiste ding om te sien. Die skakerings van blond, bo die donkerder paddastoel stingel!
Ek wou so graag blond wees. Ek het vakansies omgeloop met Sunlight liquid in my kop. As my ma dit geweet het, kon sy my onderstebo deur die skottelgoedwater trek (na my pakslae) en stapels borde reinig. Ek het ure in die son gesit, hare vol suurlemoen, drome van songebleikte hare en ‘n lekker tan. Laasgenoemde het ek gekry, maar die songebleikte hare van my drome, het my bly ontglip. Desembervakansies is ‘n aspirant haarkapper vriendin gewoonlik nader getrek om highlights toe te dien. ‘n Pynlike ervaring - daai stuk kep, en die hare wat met groot getrek, met ‘n hekelpen na buite, en na die borrelende bleikmengsel gehelp word.
Na die vakansie is die kop kort gekap, want sulke style en kleure is nie in die skole toegelaat nie.
Wat my terugbring by my eintlike storie.
In ons huis was daar so ‘n pienk driehoekige gadget van plastiek. As jy die onder en die bo-kant van mekaar wou kry, moes jy dit in teenoorgestelde rigtings druk. 3 Minora lemmetjies is dan ontbloot. Mooi gepas tussen kammetjies van verskillende groottes. Vir ‘n exploring child, was dit ‘n wonder ding!
So kom Mardene eendag met haar nuut gesnyde mushroom cut skool toe, en net daar besluit ek dat Skoor se koppie vanmiddag in is vir ‘n mushroom cut.
Nou, omdat ons plaasjapies was, selde dorp toe is, en geld maar skraps, het ma almal op ‘n ry sitgemaak, en so goed soos sy kon, ons hare getem. Die odd geleentheid wat ons in die dorp was op ‘n Saterdag, en as daar ekstra geld was, is ons by die eerste, enigste en laaste barbier winkel, van daai met die wit en rooi paletjies voor die winkel, sitgemaak, en het oom van der Linde sy bes probeer om hierdie dogtertjie soos een ander kant uit te stuur. ‘Short back and sides’ vir die manne, minder short vir my.
Na skool stap ek met doelgerigte tree die pad deur die veld, huis toe. Omdat ma nie tuis was nie, was dit ding nie gejaagd nie, en kon ek my tyd vat. Ek het voor die spieel gaan staan, pienk gadget, gelaai met die skerpste Minora’s wat ek kon vind, langs my.
Ek oefen. My hand gly links bo die oor in, agtertoe, net na die middel, uit. Ander hand. Regs bo die oor in, agtertoe, net na die middel, uit. Toe ek die bewegings reg het, en ek seker is my hande weet wat om te doen, tel ek vir pienk gadget op.
Links bo die oor in. Giiiirts se die Minora tussen die tande van die gadget. Doef, klop my hart. Die eerste hare val. Ek ruil hande. Sny regs. Die hare val. Ek hou aan. Link, regs, links, regs. My mushroom cut neem vorm aan. Twee ore staar vir my terug in die spieel. Weg is die hare om hulle.
Ek het hare opgetel en weggegooi, en met die gebrek aan ‘n klein spieel om te sien hoe die resultaat aan die agterkant lyk, het ek bly voel-voel oor my mushroom, so deur die spelery deur. Heel middag. En toe die son begin water trek, het ek begin spyt kry oor my poging. Want ma is op pad huis toe, en ek kan nie sien hoe dit agter lyk nie…
Sy’t my sitgemaak tussen kosmaak, kinder-dinge en skoolstories. My kop met ‘n ’short back and sides’ getref, en die pienk gadget weggesteek. Want reeds, onder haar sker, het ek begin wonder of ek dit nie liefs anders moet aanpak nie.
Ek het nie weer na oom van der Linde se barbier winkel gegaan nie, ek is na ‘n regte salon geneem. Waar ek trots met my eertse van vele, mushroom koppie, uitgestap het.
Ek het weer probeer hare sny. My sussie se lang hare in ‘n bob. Die haarkapper het ontsteld vir my gese dit is dalk beter as ek NIE hare sny nie. Toe my broer en my boyfriend s’n. In een aand. My broer is nou nog kwaad daaroor. Vir boyfriend het ek net gesoen en gese hy is die sexieste man in die omgewing, en hy het my geglo. Maar hy’t my nooit weer gevra vir ‘n sny nie, en die verhouding is ook kort daarna, verby. Maar dit was darem nie oor die haarsny nie!
Ek het nooit blonde hare gekry nie. Wel grys met die verloop van jare, maar dit is blykbaar wysheid. En ek is nou wys genoeg om nie weer my hand aan ‘n sker te slaan nie!
